France Parliament inthlan thawh hnihna nei

France Parliament inthlan thawh hnihna chu nimin khan neih a ni a, National Assembly-a seat 577 awmah sorkarna siam tur chuan seat 289 neih phak a ngai dawn a ni.

Pathianni hmasa khan inthlan thawh khatna neih a ni tawh a, hemi ṭuma vote tla aṭanga 50% hmu phak lo, 12.5% hmu pha chin candidate-te’n inthlan thawh hnihna hi an hmachhawn a ni.

Inthlan thawh khatnaah khan President Emmanuel Macron-a party, La République en Marche (LREM) leh a thawhpui, MoDEm chuan vote tla aṭangin 32.3% an hmu a, centre-rigth Republican chuan 21.5%, far-right National Front (FN)-in 13.2% leh far-left La France Insoumise-te’n 11% an hmu. Hetihlai hian rorellai, Socialists party leh a thawhpuite chuan vote 9.5% chauh an hmu pha a ni. Inthlan thawh khatnaah khan seat pali-ah chauh tling pha an awm a ni.

Parliament inthlanah hian President Marcon-a party hi an chak rin a ni a, a party LREM hi nikuma a din chauh kha niin, candidate zinga a tam zawk hi politics lama tawnhriat pawh la nei lo leh, inthlan pawh la hmachhawn ngai lo an ni hlawm. LREM candidate zingah hian bullfighter hlui te, Rwandan refugee leh mathematician-te pawh an tel. Majority nei turin party hian seat 289 a neih phak a ngai a, hetihlai hian LREM hian seat 400 chuang an lak rin a ni.