Myanmar sipai hotuin State of emergency pawtsei

Myanmar-a roreltu, sipai hotute chuan an rama state of emergency puan tawh chu thla ruk dang an pawtsei leh tih an puang.

State Administration Council (SAC)-in nikum February 1-a civil sorkar thuneihna an hnehchhuh hnuah Senior General Min Aung Hlaing chuan state of emergency hi a puang nghal a ni.

Min Aung Hlaing chuan national defence leh security council-te'n state of emergency pawhsei rawtna hi lungrual taka an pawm hnuah, thla ruk dang atan a pawtsei tih state media chuan nimin khan a puang.

"Kan ramah mipuite duh dan angin multi-party democratic system rintlak chu tihchak chhunzawm zel a ngai a ni," tiin Min Aung Hlaing chuan a sawi.

SAC hian thla hmasa khan sipai laka helna chawkchhuaka puh activist pali an tihlum a, an zingah hian Nobel Peace Prize laureate Aung San Suu Kyi lamṭang hnai tak pawh telin,sipai sorkar chetdan hi rights group leh United States, Japan leh Association of Southeast Asian Nations-te chuan an dem thu an tichhuak.

Myanmar-a civil sorkar paihthlaa sipai sorkar din a nih hnuah buaina a chhuak fo a, khawpui hrang hrangah lungawi lohna lantirtute chu sipai lam hian tharum hmangin an bei let ṭhin a ni.

Min Aung Hlaing chuan civil sorkar paihthlak a nih chungchang a sawifiahnaah, November 2020-a general election-a Aung San Suu Kyi kaihhruai party hneh taka thlan tlin a nih khan vote tihchingpenna lian tham tak a thleng a, sipaite hmalakna chu kalphung dik a nih thu a sawi.

Sipai sorkar hian nakkum August thlaah inthlan huaihawt a tiam thu a sawi a, mahse sawiseltu lam erawh chuan inthlan hi zalen leh dik taka kalpui a harsat an rin thu an sawi thung.