Spain PM-in kawlphetha renchem nan necktie awrh lo turin ti

Spain rama boruak lum, heatwave nasa tak thleng mek karah, prime minister Pedro Sanchez chuan ram mipuite chu kawlphetha renchemna atan necktie awrh tawh lo turin a ngen.

Kar enge maw ti liam ta aṭang khan, Europe hmun ṭhahnem tak chuan heatwave an tuar a ni. Zirtawpni liam ta khan Spain khawpui, Madrid-ah boruak lum lam hian 36C (96.8 F) leh Seville-ah 39C a kai phak a ni.

PM Sanchez chuan thuthar thehdarhtute a kawmnaah, amah pawh­in necktie a awrh loh thu leh a minister, public official leh private sector-a hnathawkte pawh ti ve turin a beisei tih a sawi. "Heti hian kan vaiin kawlphetha kan hum thei dawn a ni," a ti. Necktie an awrh loh chuan lum an tih lutuk pawh a ziaawm deuh anga, air conditioner pawh an hman tlem phah dawn tih a sawi.

Spain sorkarin eng renchemna tura ruahman­na a siam chu nimin khan Parliament chuan a pawmpui fel hman beisei a ni. Heng zingah hian sumdawngte chu air conditioner an hman lai chuan kawng­kharte hawng lo tura ngenna pawh a tel.

Europe ram ṭhahnem takte chuan khaw lum lutuk kara taksa vawn daih dan tur an ruahman hlawm a, UK-a politician-te chu House of Commons an awm chhung chu suit ha lo tura tih an ni. Germany sorkar chuan public pool leh sports centre-ah chauh cold shower an pek theih thu an tichhuak bawk.