Gotabaya Rajapaksa rawn let hun a la ni lo : Sri Lanka President

Sri Lanka president thar Ranil Wickreme­singhe chuan Pathianni khan president hlui, Singapore-a tlanchhe mek Gotabaya Rajapaksa chu an rama a rawn let chuan politics-a buaina nasa zawk a thlen theih avangin tunah chuan an rama rawn let leh hun a la nih loh thu a sawi.

Mipui lungawi loten bang tura an nawrh hnuah Rajapaksa hian July 13 khan an ram chhuahsanin President a nihna aṭangin a bang zui a ni. Hemi hnu hian Wickremesinghe chu President atan thlang­in, lakluh a ni. Wickre­mesinghe hian Rajapaksa hi sorkar hmalakna tur kawng hrang hrangah a la bepawp reng a ni.

Sum lama talbuai mek Sri Lanka hian an leiba laka kaihchhuah an nih theih dan tur chungchang International Monetary Fund nen an sawidun mek. April khan, Sri Lanka hian a leiba neih, USD tluklehdingawn 12 chu rul chhunzawm thei tawh lo a, kum 2025 hmain USD tld 21 dawn leiba pek tur an nei tawh a ni.

Wickremesinghe chuan August thla ral hmain IMF staff-level-ah inremna an neih hman an beisei thu a sawi.