US-in drone hmanga a beihnaah al-Qaida hotu Ayman al-Zawahiri a thi

United States-in Afgha­nistan-a drone hmanga a beih­naah al-Qaida hotu Ayman al-Zawahiri a thi tih US president Joe Biden chuan a sawi.

Afghanistan khawpui, Kabul-a CIA-in Pathianni liam taa firfiak laka beihpui an thlaknaah Zawahiri hi a thi a ni.

President Biden chuan Zawahiri hian US mi leh sate lakah tharumthawhna leh tualthahna ṭhahnem tak a lo thlen tawh a ni tiin, "Tunah chuan rorelna dik kan hmu let ve leh ta, firfiak hotu chu a awm ta lo," a ti.

Zawahiri hian kum 2011-a al-Qaida hotu Osama Bin Laden a t hih hnuah an pawl hotu nihna hi a chelh chhunzawm a ni. Bin Laden nen hian 9/11-a US-a pawikhawihna rapthlak tak kha an ruahman dun a, US 'most wanted terrorists' zingah a tel.

Official-te chuan a in bathlara a awm laiin drone aṭang hian missile pahnihin kah a ni, an ti. He thil thlen lai hian a chhungte pawh inah an awm a, mahse midang chuan hliam pawh an tuar lo tih an sawi.

Biden chuan thla eng emaw zat ruahmanna an kalpui hnuah kum 71 mi, al-Qaida hotu beihna tur hi a pawmsak tih a sawi a, kum 2001-a an pawikhawihna avanga mi 3,000 dawn thihna thleng avanga chhungkua a nghawngte chungah damna a thlen dawn a ni, a ti. "Eng ang pawhin hun duh reiin, eng ang pawhin biru mah ula, kan mite tana hlauhawm in nih chuan United States chuan kan zawn chhuah hunah kan dah bo nghal ang che u" tiin Biden chuan an ram leh mipuite venhim kawngah tawlhsawn an tum loh thu a sawi nghal bawk.

US President chuan Zawa­hiri hi pawikhawihna dang ṭhahnem taka an thluak bur leh ruahmanna siamtu a ni tiin, heng zingah kum 2020 October thlaa Aden-a USS Cole naval destroyer-a thihchilh bomb tihpuahnaa US sailor 17 thihna leh, kum 1998-a Kenya leh Tanzania rama US embassy-a beihnaa mi 233 thihnaah pawh a mawhphurtu a nih thu a sawi. Afghanistan chu firfiakte tana hmun him a nih tawh loh tur thu a sawi nawn bawk a ni.

Hetih lai hian Afghanistan-a rorellai, Taliban thupuangtu chuan US operation chu inter­national thuthlung bawh­chhiatna dik tak anih thu sawiin, Zawahiri hming erawh an lam ri lo thung.

Tu nge Ayman al-Zawahiri?
Zawahiri hi kum 1951, June 19 khan Egypt khawpui, Cairo-a middle-class chhungkaw zahawm takah piangin a seilian a ni. Amah hi eye surgeon niin, kum 2011 May thlaa US sipaite'n Osama Bin Laden an thah hnuah al-Qaida-a thuneihna a chang zui a, Egyptian Islamic Jihad militant group dinna turah a pui bawk a ni.

Zawahiri hi kum 2001-a US sorkarin "most wanted terrorists" list an tihchhuahah Bin Laden dawtah awmin, a lu man atan USD maktaduai 25 an phal.

US-in kar liam taa Zawahiri an beihna kha a vawi khatna a ni tawh lo. Kum 2006 khan Pakistan leh Afghanistan inrina bulah US missile hmanga bitum a lo ni tawh bawk.

Kha inbeihnaah khan al-Qaida member pali an thi a, mahse Zawahiri erawh dam chhuakin kar hnih hnuah hetih laia US president George W Bush vauna thu video-in a rawn tichhuak a, Bush leh khawvela thiltihtheihna zawng zawng chuan a thih hun tur chu an rel sak thei lo tiin a sawi.