Israel leh Jordan-in industrial park siam dawn

Israel chuan dollar maktaduai chuang senga sak Jordan ram nena an lo pawm tawh, ramri-a joint industrial park chu siam turin hma an la ṭan dawn tih a sawi.

He project, “Jordan Gateway” tia sawi chungchanga thutlukna hi Pathiannia Israel cabinet meeting-ah an rel a ni.

Israel thuchhuah tarlan danin, kum 1994 khan ram pahnihte hian joint industrial park chungchang sawidunin inremna lo siam tawh mah se, inremna tluantling leh a hmawrbawkna erawh chu kar liam taa Jordan lal, King Abdullah II leh Israel prime minister Yair Lapid-ten Jordan khawpui Amman-a meeting an neihah an siam theih chauh thung.

Kum eng emaw chen chu he project hnathawh hi ṭan a lo ni tawh a, ram pahnihte inkarah hian lei pawh dawh fel a ni tawh bawk.

An park siamna tur hi Israel ram luah, West Bank hmarchhak lama, Beih She'an khawpui hnaih, Beisan tia sawi bulah a ni. Israel sorkar chuan he project hi Israel shekel mtd 200 (USD mtd 59) senga siam ani dawn tih sawiin, park hmun atan hian Jordan ram lamah ram hectare 70 leh Israel lamah ram hectare 24-a zau ruahman a ni.