London-a inpawngchîlna: Finsbury Park-a Muslim-te pawngchilnaah mi pakhat thi

London khawpuiah chhiatna dang a thleng leh a, North London-a Finsbury Park Mosque-a Muslim ṭawngtai zote chu mi tu tih hriat lohin van-in a pawngchil a, mi pakhat a thih bakah midang 10-in hliam an tuar.

Pawikhawihna hi London sana Thawhṭanni zan zanlaia thleng a ni. Police-te chuan pawikhawihtu hi kea kalna tura siamah van hian a tlan lawn a, Mosque aṭanga Muslim ṭawngtai zo lo chhuakte chu a pawngchil ta tih an sawi. Pawikhawihtu hian chemte a keng tih an sawi a, pawikhawihtu nia rinhlelh hi a hnuah man nghal niin, kum 49 mi vel a ni. Finsbury Park Mosque hi police motor, ambulance leh fire duty-te’n thleng ve nghal bawk. Mita hmutute chuan pawikhawihtu hian Muslim zawng zawng thah vek a duh thu a au chhuahpui niin an sawi. Pawikhawihna a thlen hnu hian motor aṭanga chhukin Muslim thah a duh thu hi a auchhuahpui leh bawk tih an sawi. Metropolitan police hotu, Neil Basu chuan rinhlelh dang an nei lo tih a sawi. Metropolitan Police-te leh Counter-terrorism officer-te chuan Finsbury Park Mosque hi an thleng ve nghal thuai a, hnu chhui hna an thawk a ni.

Muslim Council of Britain-a secretary general Harun Khan chuan, Muslim-te chunga rawng taka chetna a thleng leh ta chu pawi a tih thu sawiin, venhimna ṭha zawk pek an phut tih a sawi. Tunhnaiah Muslim-te’n vauna leh beihna an tawh fo avangin, thuneitute pawh mosque leh a chhehvelah venhimna khauh zawka kengkawh turin an lo ngen tawh tih a sawi bawk.

Prime Minister Theresa May chuan he thil thleng hi terrorist-te thil tih a nih theih thu a sawi. Muslim-te’n beih an tawk chu pawi a tih thu sawiin, thi chhungte leh hliam tuarte chu thinlung taka a tawrhpui thu a sawi. Mipuite chu chiai lo turin a ti a, pawikhawihtute chu na taka an chhanlet zel tur thu a sawi.

UK-ah hian tunhnai thla li chhungin chhiatna lian tham ṭum li zet a thleng tawh a ni. Home Secretary Amber Rudd chuan he thil thleng hi chhui zui nghal a nih thu sawiin, inhuatna leh buaina chawk chhuak zawnga chete chu na taka chhanlet zel an nih tur thu a sawi ve bawk.

Labour party hruaitu Islington North MP, Jeremy Corbyn chuan Finsbury Park-a thil thleng hi pawi a tih thu a sawi a, khawpui chhunga mosque zawng zawng­ah venhimna khauh zawka kenkawh a ngaih thu a sawi. Pawikhawihna thlenna hmunah hian Forensic team pawh tirh nghal an ni.