Mali-a tourist resort bei

Mali rama tourist resort lar tak, Le Campement Kangaba chu silai kengten an bei a, khualzin pahnih an thi a, midang pahnihin hliam an tuar bawk.

Security minister Salif Traore chuan an ram khawpui, Bamako khawchhak lama tourist resort beihna chu firfiakte thiltih ngei niin a sawi a, pawikhawihtu mi pali-te chu security force-te’n an kaphlum ve nghal niin a sawi. An mi kahhlum ruang pakhatah hian machine gun bakah, bomb te pawh an hmu tel niin a sawi bawk.

Ministry thupuangtu chuan he resort-a pawikhawihna thlen hnu hian he hmuna thleng mi 32 chhanchhuah an nih thu a sawi. Resort beitu firfiakte beihlettu police-te hi Malian special force bakah UN sipaiten an pui bawk a ni.

Mali ramah hian firfiakte pawikhawihna a thleng fo a, kum 2015 November thla khan silai kengten Bamako-a Radisson Blu hotel beiin mi 20 an thi a, khualzin leh staff-te an hreng zui bawk. Hemi hnu hian Mali ramah hian state of emergency puan niin, April thla khan thla ruk atan pawhsei leh a ni.

Mali ramah hian firfiakte beih letna kawnga sorkar pui turin France sipai leh UN sipai 10,000 vel an awm mek a ni. Tun thla tir lam khan Bamako-a US embassy chuan khawthlang mite awm tamna hmun chu firfiakten an beih mai a hlauhthawnawm thu pawh a lo sawi tawh a ni.