France inthlanpuiah Macron-a party chak

France ram Parliament inthlanpui thawh hnihna, Pathianni-a neih zawh takah President Emmanuel Macron-a party, La Republique en Marche (LREM) chu hneh taka thlan tlin an ni.

National Assembly seat 577 awmah LREM hian seat 315 an la a, party mal pawhin majority an nei pha a ni. LREM hian a thawhpui MoDem centrist party nen seat 360 an la pha a ni. Heti chung hian inthlan hmaa rin lawk aiin LREM hian seat an la tlem zawk a ni.

LREM hi kum 39 mi, Macron-a’n nikuma a din chauh kha a ni a, tun ṭum inthlanah pawh hian an party candidate tam zawk chu politics lama tawn hriat la nei lo leh, an vawi khat chuhna a ni hlawm.

Inthlan thawh hnihnaah hian vote a tla ṭha lo hle a, vote tla hi 42% vel chauh a ni.

Conservative Republican chuan seat 133 lain, eptu party lian ber an ni dawn a, far right National (FN) chuan seat ruk lain, rorellai Socialist Party chuan seat 32 chauh an la pha a ni.

President Macron hian inthlan dawna a campaign-naah an ram sum dinhmun siamṭha tura inrenchemna kalpui a tum thute a sawi a, sorkar hnathawk pawh 120,000 vela tihhniam a tiam bakah, labour markert leh state pension scheme siamṭhat te a tiam bawk. Hetih lai hian an party MP zahve dawn chu rorelna kawngah tawnhriat la nei lo an nih avangin a hmabak a hautak hle rin a ni.