Portugal ram kanga thi te ni thum chhung sun dawn

Portugal sorkar chuan ram kang avanga thite chu ram pumah ni thum chhung sun an ni dawn tih a puang. Pedrogao Grande biala ram kang vanga thi hi mi 61 an tling tawh a ni.

Prime Minister Antonia Costa chuan ram kang avanga chhiatna an tawh rapthlak ber a nih thu sawiin, ram kan chhan hi hriatchian a la nih loh thu leh, tek thla vang a nih mai theih thu a sawi.

Ram kang avanga thi zingah hian kangṭhelhtu pali an tel a, mi 54-in hliam an tuar bawk. Chin hriat lohin mi eng emaw zat an la awm avangin thi zat pawh hi an la punchhoh rin a ni. Kang ṭhelh hna hi kangṭhelhtu 1,600 chuangin an thawk mek a, motor 400 leh thlawhtheihna 18 an hmang bawk. Hmun tam zawkah ram kang hi ṭhelh thei mah se, hmun 11-ah chuan a la kang nasa hle a, hmun hnih phei chu a la hlauhawm hle niin an sawi. Emergency service pui turin sipai battalion hnih tirh an ni bawk.

Ram kang hi kar kalta Inrinni aṭanga chhuak kha niin, khawlum a lum bakah khua a ro bawk avangin a darh chak hle a ni. Hmun ṭhenkhatah chuan khaw lum lam hi 40C te a tling a ni. Pedrogao Grande mayor Valdemar Alves chuan an bialah hian ram kang a thleng fo a, mahse tun anga chhiatna rapthlak chu ala thleng ngai lo tih a sawi.