US-in Syria thlawhtheihna kap thla

US kaihhruai ṭangrual ramte chuan Raqqa province-ah Syria sipai thlawhtheihna an kap thla.

Syrian army-te chuan indo thlawhtheihna hi Islamic State (IS) firfiak pawl beia a thlawhchhuah laiin, Pathianni khan kahthlak a nih thu an sawi. He thil thleng hi an dem thu sawiin, firfiakte an beih letna kawng atan pawh thil ṭha lo tak niin a sawi.

Hetihlai hian US chuan Syria sipai thlawhtheihna hian US thlawp fighter-te awmna bul hnaiah bomb a thlak avangin invenna atan an kap niin a sawi thung.

Raqqa khua hi IS kutah a awm a, Syrian Democratic Forces (SDF) fighter-te chuan US kaihhruai ṭangrual ramte puihnain firfiakte hi an bei mek a ni. Syria thlawhtheihna kahthlak a nih hma hian US chuan SDF fighter-te hi Syria sipaite chuan beiin tam takin hliam an tuar a, hei vang hian an che ve ta mai niin a sawi. Hemi rual hian Syria sorkar nena inbeih chu an tum a ni lo tih a sawi bawk.

US chuan IS firfiakte beih let hna thawk mek, ṭangrual ram leh an thawhpuite beihna chu an enliam mai mai dawn lo tih a sawi. Tun thla tir lam khan US hian Syria sorkar armed drone chu al-Tanf border bulah ṭangrual sipaite a kah avangin a lo kahthlak sak tawh bawk a ni.