Khawvel pumah ral tlan mtd 65.6 awm

United Nations refugee agency-in a tarlan danin nikum chhung khan khawvel ram hrang hrangah hmun danga tlanchhia, ral tlan mi maktaduai 65.6 an awm. Heng zinga maktaduai 12 chu Syria tualchhung indona avanga tlanchhia te an ni.

Hmun danga tlanchhia te hi tualchhung indona thleng avanga ram dang leh mahni ramchhung hmun danga raltlante bakah, ramdanga himna zawnga lutte an ni. Raltlan hi kum 2015 aiin nuai thumin an tam zawk.

UN high commissioner for refugee Filippo Grandi chuan hetiang zat tlanchhiat ngaia an la awm chu pawi a tih thu sawiin, khawvel chuan remna leh muanna a la siam thei lo nia a lan thu a sawi. Hun rei tak buaina tawkte an awm rualin, buaina chhuak thar pawh a awm reng a ni, a ti. Kum 2016 chhung khan South Sudan aṭangin mi 340,000 chu an ram ṭhenawm Uganda-ah an tlanchhia a ni. Uganda ramah hian ram enkawl tur leh hmanruate pek an ni a, an mahniin ei an inzawn chawp ṭhin.

UN chuan himna zawnga tlanchhia pung chho zel chuan ram hausa zawkte chona a siamsak a, raltlan tam zawk an lakluh phah bakah, khawvela remna leh muanna a awm theih nana theihtawp an chhuah chhoh a beisei thu a sawi.

Himna zawnga in leh lo tlansan mi maktaduai 65.6 zinga maktaduai 22.5 hi ramdangah an raltlan a, mahni ram chhunga tlanchhia hi mi maktaduai 40.3 an awm bawk. Turkey ram chuan raltlante hi lo dawng hnem berin mi maktaduai 2.9 a la lut a, Pakistan-ah mi maktaduai 1.4, Lebanon-ah maktaduai khat, Iran-ah 979m400, Uganda-ah 940,800 leh Ethiopia-ah mi 791,600 an lut a ni.