NKorea aṭanga hruai haw US zirlai a thi
North Korea-in hun eng emaw chen a hren hnua American zirlai a haw tir tak chu a thi.
US zirlai Otta Warmbier, kum 22 mi hi study tour-a North Korea-a zin zingah a tel a, an haw dawnah an thlenna hotel-a thil tar a lak avangin kum 2016, January 2 khan Pyongyang International Airport-ah man a ni a, hren zui a ni. Nikum March 16 khan a chungthu hi ngihtuah a ni a, kum 15 chhung hrehawm taka tang turin hrem a ni. A hremna tur puan a nih hnu lawkah Warmbier hi nikhaw hre lo, coma-in a awm zui ta a ni.
Warmier-a chanchin hi hun rei tak hriat a nih loh hnuah, tun thla tir lam khan US official leh a nu leh pate hriattir an ni a, June 13 khan North Korea chuan a chhuah a ni. US lamah phurh haw nghal niin, damdawi-inah enkawl zui niin, Thawhṭanni, June 19 khan a thi zui ta a ni.
Ottoo Warmbier-a pa chuan a fapa hian a tannaah nghaisak a tawk nasa hle niin a sawi a, mahse doctor-te chuan scan aṭanga a lan danin nghaisakna hnuhma hi an hmu lo niin an sawi thung. Doctor-te chuan oxygen tlakchham vang leh a thluaka thisen tling vangin thawk lamah harsatna a nei chho nia an rin thu an sawi.
US President Donald Trump chuan Warmier-a chunga thil thleng chu pawi a tih thu sawiin, mihring zahna neilo sorkar kuta pawisawilote tawrhna thleng ṭhin veng tura theihtawp a chhuah tur thu a sawi a, North Korea sorkar chet dan chu a dem thu a sawi.