Qatar-in Gulf ram te inbiakna neihpui tum lo
Qatar ram chuan an ṭhenawm Gulf ram dangte nen an inkar boruak siamṭhat a duh thu a sawi rualin, Gulf ram dangten insumdawn tawnna leh inkalpawhna lama an block-na chu an tihtawp hma loh chuan inbiakna neihpui a tum lo tih a sawi.
United Arab Emirates, Saudi Arabia, Egypt leh Bahrain chuan Qatar hi firfiakte thlawp leh sum hmanga ṭanpui ṭhinah puhin an inzawmna an lo chhu chat tawh a, an inkalpawhna te pawh an khar a ni.
Qatar chuan a ṭhenawm ramten firfiakte thlawp leh puia an puhna chu thu dik lo a nih thu a sawi thung. Foreign Minister Sheikh Mohammed bin Adbulrahman al-Thani chuan Gulf ram dangte nena an harsatna neihte chu inbiakna ṭha tak hmanga chinfel dan kawng zawn an duh tih a sawi a, mahse hemi hma hian an ram an hrekna chu hlih phawt a phut thung.
Sheikh Mohammed chuan ram dangten an block-in an ram chhunga sum lama nghawng a neih dante sawi turin karleh khian US-ah zin a tum thu a sawi. “US nen hian inzawmna nghet tak kan nei a, firfiaka chetna thleng ṭhin beihletna kawngah pawh kan thawkho ṭha hle a ni”, a ti.
Gulf ram dangte hrekna siam avang hian an khua leh tui te, ram ṭhenawma cheng leh chhungte nei ten harsatna an tawk niin Qatar sorkar chuan a sawi. UAE, Saudi Arabia leh Bahrain-a zin tum tam takte chu an kal thei lo a, an chhungte nen pawh an intlawhpawh thei lo a ni.