Venezuela president-in sipai hotu pali ban

Venezuela President Nicolas Maduro chuan an rama sipai hotu pali-te chu a ban a, hei hi nawrh huaihawt­te laka security force-te’n silai mu tak an hman vanga nia sawi a ni. President Maduro chuan police officer leh national guardmen 40,000 lak thar a nih tur thu a sawi nghal bawk.

President-in a ban zing­ah hian National Guard hotu, Gen Antonio Benavides Torres pawh a tel a, ani hi sorkar laka nawrh huaihawtte chuan security force-te’n an beih letna kawnga mawphurtu berah an puh an ni. Ani bakah hian army, navy leh central strategic command hotute pawh a thlak vek tur thu president chuan a sawi.

Venezuela ramah hian President Maduro leh a kaihhruai sorkar duh lohna lantirin hun rei tak nawrh huaihawt a ni tawh a, nawrhna hmunah hian tharum thawhna a chhuak fo a, security force-te nen pawh an innawr buai ngun hle. Lungawi lohna lantirtute hian petrol bomb-te an hmang ve bawk.

Mexico-a Oganization of American States (OAS) meeting-ah, member ram 34 zinga 12 chuan President Maduro chu an rama nawrh huaihawtna thleng mekah mipuiten dikna chanvo an neihte zahsak turin an ngen a, hei bakah hian inthlan neih hun tur puang turin an phut bawk. Mahse Venezuela Foreign Minister Delcy Rodriguez chuan OAS Secretary General Luis Almagro chu an ram dinhmun tichhe zawk leh, tualchhung indona hial thlentir tumah a puh thung.