US Speaker Nancy Pelosi-in Taiwan a tlawh hnuah China-in Taiwan khuahkhirhna thar a tichhuak

United States house speaker Nancy Pelosi-in Taiwan a tlawh hnuah, China chuan Taiwan aṭanga thei leh sangha a lakluh ṭhinah nimin khan khuahkhirhna a tichhuak.

Nancy Pelosi-i'n Taiwan a tlawh hi kum 25 chhunga US highest-profile official-in a tlawhna hmasa ber a ni. China-in tlawh lo tura a vau reng chung­in Thawhlehni tlai khan Taiwan hi a thleng a ni.

China chuan Taiwan hi a ram chinah a la ngai nghet tlat a, a ṭul a nih chuan eng tik niah emaw tharum hmanga laklet leh a tum ngei rin a ni bawk.

China Customs Adminis­tration chuan nimin khan thu­chhuah siam nghalin, Taiwan aṭanga thei leh sangha an lakluh ṭhinah pesticide hnuhma bakah package ṭhenkhatah coronavirus hmuh a nih avangin an lalut tawh rih lo dawn tih a sawi.

Commerce Ministry pawhin Taiwan tana natural sand an thawnchhuah ṭhin pawh a titawp tih a sawi a, a chhan erawh a sawilang lo.

China thuneitute chuan Taiwan chhehvelah live-fire military drill neih an tum thu an puang thar bawk.

China hian hremna atan Taiwan aṭanga a thil lakluh ṭhin chu a hmain a lo titawp tawh bawk. Kum 2021 March thla khan Taiwan aṭanga lakhuihthei lakluh ṭhin chu a titawp a, hei hi thei tichhetu rannung hmuh tel a nih vang niin a sawi a, mahse hei hi politics thil vang nia rin a ni thung.

Kum 2016-a Thailand presi­dent atana Tsai Ing-win-i lakluh a nih aṭangin China hian Taiwan hi a nawr na zual chho hle. President Tsai hian Taiwan chu mahnia ro inrelna ram bung hrang leh, China hnuaia mi a ni lo, a ti a ni.