IS-ten Mosul-a al-Nuri mosque an bomb chhia

Islamic State (IS) firfiakte chuan Iraq khawpui lian pahnihna, Mosul-a hmun pawimawh, kum 800 chuanga upa Grand al-Nuri Mosque an bomb chhia.

Mosul khua hi firfiakte kut aṭanga laklet tumin Iraq sipaiten beihpui an thlak mek a, US kaihhruai ṭangrual ramten an pui bawk a ni. Sipaite hian khawpui tam zawk chu an la let tawh a, khawpui khawthlang lam bial chu firfiakte kutah la awmin hei hi lak tumin an bei leh mek a ni.

Iraq sipai leh ṭangrual sipaite chuan Grand al-Nuri Mosque hi firfiakten an bomb chhia tih an sawi a, hetihlai hian firfiakte chuan US kaihhruai ṭangrual ramte tihchhiat niin an sawi thung. Mahse US sipaite chuan an puhna hi phain, he mosque awmna bul velah hian bomb an thlak loh thu US Air Force thupuangtu, Colonel John Dorrian chuan a sawi.

Grand al-Nuri Mosque hi kum 1172-73 laia sak a ni a, an ram tana bei hmasatu pasalṭha Nuruddin al-Zanki hming chawia phuah a ni. He mosque-ah hian Islamic school pawh a awm tel. Kum 2014 June thlaa IS hotu lu ber, Abu Bakr la-Baghdadi-an an ram lak china Islam ram din a nih thu a puanna hmun kha a ni.

Iraq Prime Minister Haider al-Abadi chuan mosque hmingthang tak tihchhiat a ni chu a dem thu a sawi a, firfiakte hnehin an awm tihlanna a ni, a ti.

Grand al-Nuri Mosque hi Iraq mipuiten an ngai hluin an dah pawimawh hle a, tihchhiat a nih avang hiam mipuite an thinur hle. Ram hrang hrang pawhin he thil thleng hi an dem thu an sawi.