Kum 2050 ah khawvelah mihring tld 9.8 tling tawh dawn

United Nations report-in a tarlan danin khawvel puma mihring awm zat, tluklehdingawn 7.6 chu kum 2050-ah tluklehdingawn 9.8 a tling tawh dawn a, ram khatah mihring tam lamah India chuan China a lehpel dawn bawk a ni.

Kum 2050-ah chuan Nigeria-a mihring awm zat chuan US lehpelin, khawvela mihring tamna ram pathumna a ni tawh dawn niin UN Department of Economic and Social Affairs chuan a tarlang.

Report chuan kumtinin khawvela mihring awm zat chu maktaduai 83 velin an pung zel a, kum 2030-ah tluklehdingawn 2030 tlingin, 2050-ah tld 9.8 leh kum 2100-ah chuan mihring tluklehdingawn 11.2 an awm tawh dawn a ni, a ti.

Khawvela mihring tamna ram pahnihna ni mek, mi tluklehdingawn 1.3 awmna India chuan mi tluklehdingawn 1.4 awmna China chu kum 2024 ah a pel tawh dawn a ni. Mahse mihring pun chakna ber ram chu Nigeria a ni a, Africa ram dang 26-te chu kum 2050 ah chuan a leta an pun chhoh rin a nih thu report chuan a tarlang bawk.

Kum 60 leh a chung lam chu kum 2050 ah tun aiin a leta an tam rin a ni a, kum 2100-ah chuan a let thumin an tam bawk ang. Kum 60 chung lam hi kum 2017-ah khawvel ram pumah mi maktaduai 962 awmin 2050-ah chuan tluklehdingawn 2.1-ah an pung ang a, kum 2100 ah chuan tluklehding­awn 3.1 an awm tling tawh dawn a ni.