Taliban-in US thuchhuah chhui zui dawn ; Al-Qaida hotu thihna finfiahna a awm loh thu sawi
United States-in Aghanistan khawpui, Kabul-a drone strike a neihnaah al-Qaida hotu Ayman al-Zawahiri-a a thi nia thuchhuah a siam chu Taliban chuan a chhui zui dawn tih a sawi. Al-Qaida hotu a thi nia sawi chungchangah finfiahna a awm lo tih a sawi bawk.
Zawahiri hi Kabul-a a bihrukna in bathlara a a awm laiin Pathianni khan drone aṭangin missile-in an kap fuh tih US official chuan a sawi a, kum 10 chuang liam taa Osama bin Laden an thah hnua firfiak hming liantham an thah lehna hmasa ber a ni.
United Nations-a Tabilan aiawhtu atana ruat, Suhail Shaheen chuan, "Taliban sorkar leh hruaitute chuan US thuchhuah chungchang hi engmah an hre lo," tiin, US thuchhuah chu a rintlak em tih chhui chian an tum tih a sawi bawk. An chhui chianna chu mipui hriata puanzar an tum thu a sawi bawk a ni.
Pathiannia US-in drone strike a neih chungchangah Taliban hruaitute hian thuchhuah an la siam hlawm lo a, Zawahiri a thi nia sawi pawh tumahin an la nemnghet lo bawk. US drone strike chhan let dan tur chungchang hi an sawiho mek niin an tarlang.
Egyptian doctor Zawahiri hi kum 2001 September 11-a United States beihnaah khan a inhnamhnawih a, khawvel huapa 'most wanted men' zingah a tel.
Kabul-a a bihrukna hmuna Zawahiri thah a ni tia sawi hian Taliban-te hian tawmhimna tur an lo pe em tih zawhna a awm nghal a ni. Taliban hian kum 2020-a US nena inremna an siamah, an rama US sipaite lakchhuah an nih chuan anni pawhin firfiak pawl dang tan humhimna pe lo turin an intiam a ni. Taliban-te rinhlelhna rawn piang nghal mah se, Shaeen chuan US nena inremna an siam tawh chu an zawm thu a sawi thung.