Myanmar-a intihhlumna thleng ṭhin titawp turin ASEAN-in vau

Association of Southeast Asian Nations (ASEAN) chuan Myamnar sipai sorkar chuan mi tangte tihhlumna thleng ṭhin chu titawp turin a vau.

Myanmar sipaite chuan tun hnaia sipai sorkar dodala puha thiam loh a chantir mi palite chu a khaihlum a, an zingah hian democracy tundin duha beitu mi pahnih an tel. He thil thleng hi ram hrang hrangin na takin an lo sawisel tawh a ni.

ASEAN chair ni lai Cambodia chuan Nilaini khan Myanmar chu vauin, mi tang tihlum tawh lo turin a hrilh.

Ram 10 awmna, ASEAN foreign minister-te hian Cambodia khawpui, Phnom Penh-ah meeting neiin, Myanmar tualchhung buaina chinfel a nih theih dante an ngaihtuah a ni. Nikum April thlaa ASEAN hruaitute leh Myanmar sipai sorkarin Myanmar ram chhung buaina tihtawp a nih theihna tur leh, sipai sorkar duh lotute nena inbiakna nei tura inremna an siamte Myanmar sipaiten an kengkawh ṭha lo chu ASEAN member hian an sawisel bawk a ni.

Cambodia prime minister Hun Sen chuan Myanmar sipai sorkarin mi tang a tihhlum belh leh a nih chuan, inremna an lo siampui tawh chungchang chu an ngaihtuah ṭhat leh a ngai dawn a ni, tiin a sawi. Eptute inbiakna neihpui a, inremna leh boruak muanawm a awm theihna tura hma la tura an ngen hnuah, activist-te tihhlum an ni chuan bloc member ramte pawh a tihnualin a tihrilhhai hle tih a sawi.

Malaysia foreign minister Saifuddin Abdullah pawhin November thlaa ASEAN hruaituten summit an neih hma ngeia Myanmar ramchhung dinhmunin ṭhat lam a pan loh chuan, an ram hruaitute chuan zawhna khirh tak tak chhan tur an hma­chhawn ngei a ngai tawh dawn a ni, a ti.