Pelosi-i'n Taiwan a tlawh hnu lawkah China-in Military Drill lian ber huaihawt
China chuan nimin aṭang khan military exercise lian ber chu Taiwan ram hualin a nei. Hei hi US House Speaker Nancy Pelosi-i'n Taiwan ram a tlawh avanga a lungawi lohna a lantirna kalzel nia ngaih a ni.
Taiwan ram tlawh lo tura China-in a vau chungin Pelosi hi a kal lui a, kum 25 hnua highest-profile elected US official-in a tlawhna hmasa ber a ni. Her am a tlawh hian United States chuan mipui rorelna ramte a thawhpuina chu a thlahthlam ngai dawn lo tih tichiangtu a ni, tiin a sawi zui bawk.
Pelosi a zin luih avangin Taiwan chungah China a thinur hle a, hei vang hian Taiwan rama thil thawnchhuah khuahkhirhna turte a siam zui nghal bawk a, nimin aṭang khan a hremna pakhat atan Taiwan hualtu tuipuiah military execise lian ber hi a nei zui leh bawk a ni.
Military exercise hi nimin chhun dar 12 aṭanga ṭanin, 'live-firing' pawh an nei tel niin state media chuan a sawi. State broadcaster CCTV chuan exercise neihna atan hian Taiwan hualtu tuipuiah hian hmun paruk thlangin, heng hmunah hian exercise neih chhungin lawng leh thlawhtheihnate pawh an luh phal a ni dawn lo tih a sawi.
He exercise hi Taiwan chhehvela zone ṭhahnem takah an nei dawn a, zone ṭhenkhat chu tuipui kam aṭanga kilometre 20 vel chauha hla niin, Pathianni chhun thleng a awh ang.
Taiwan defence ministry chuan uluk takin drill hi an thlithlai reng tih a sawi a, indona thlen tir duh loh mah se, indona thlen palh thulh atan an inbuatsaih tih a sawi a ni.