Pakistan-a bomb puakah mi pakua thi
Pakistan chhimthlang lam, Quetta khuaah nimin zing khan provincial police chief office bulah car bomb tihpuah a ni a, mi pakua an thi a, mi dang 12 in hliam an tuar.
Car bomb hi police checkpost bulah tihpuah a ni a, thi zingah hian police officer panga an tel. Hliam tuar zinga mi panga-te chu an dinhmun a ṭha lo hle.
Bomb phurtu motor hi checkpost bulah police te hian lo tidingin enfiah an tum laiin a bomb phurh hi a puak ta niin provincial government thupuangtu Anwar ul Haq Kakar chuan a sawi. Bomb puah hun hi zing dam dar 8.45 vel a ni a, Toyota Corolla car-ah bomb hi tihpuah a ni. Bomb puak hian a bul vel pawh a tichhe nasa hle.
Tun hnaiah Balochistan province khawpui, Quetta-ah hian sorkar building leh security force-te beihna ṭum li a thleng tawh a ni. February thla khan Sayrab bridge-a bomb puak vangin bomb disposal squad member pahnih an thi a, mi 11 in hliam an tuar. Nikum August thla khan khawpui chhunga Civil Hospital chu beih a ni bawk a, mi 74 an thi a, police academy beihnaah mi 60 an thi bawk. Heng pawikhawihna thlengte hi Pakistani Taliban, ISIL leh Balochistan-a inlakhran duhtu pawlte chuan an tih niin an chhal a ni.