Choi Soon-sil-i kum thum tang turin hrem

South Korean court chuan President paihthlak tak, Park Guen-hye ṭhian ṭha leh thawhpui, Choi Soon-sil-i chu thamna laa puhna thubuaiah thiam loh chantirin, kum thum tang turin a hrem.

Seoul Central District Court chuan Choi-i hi President nena an inṭhian ṭhatna chu a Seoul-a university lar tak, Ewha Woman’s University-a a fanu luhtirna atana hmang ṭangkaiah a puh a, grade ṭha tak neihtirah a puh bawk. Ewha Womans University-a president hlui, Choi Kyung Hee leh admission hotu hlui Namkung Gong te pawh Choi-i fanu, Chung Yoo-ra laka duhsakna an lantir avangin jail tang tura hrem an ni bawk.

Choi-i hi sorkara nihna pawimawh a nei lo chungin Park Geun-hye-i president lai hian sorkar inrelbawlna leh policy siamna kawngah a inrawlh thuk hle a, Park-i hian a ṭhiannu foundation enkawlna atan company liante chu sum pe turin a ti a, hemi chhan let nan hian sorkar lam aṭangin company-te hian duhsakna an dawng nia sawi a ni. He thil thleng avang hian Park-i hi president anihna aṭangin paihthlak a lo ni tawh a ni.

Choi-i hian midangte hnena sum pe tura nawr lui leh thuneihna dik lo taka hmanga puhna thubuai a nei mek a, heng thubuaiah hian thiam loh chantir a nih chuan damchhung tantir theih a ni ang.

President hlui Park-i pawh hi thamna sum la, thuneihna hmang dik lo leh sorkar thuruk tiput rua puh chungchangah a chungthu ngaihtuah mek a ni bawk.