US-in Brazil aṭanga sa lakluh a titawp

Unites States chuan Brazil ram aṭanga sa a lakluh ṭhin a titawp vek a, hei hi sa thianghlim leh him zawk lakluh a nih theih nana ti an ni.

Brazil prosecutor-te chuan health inspector-ten sa thianghlim leh thianghlim lo an enfiahnaah sa siamtute hnen aṭangin sorkar pawmpuina certficiate an neih theih nan thamna an la ṭhin niin an lo sawi tawh a, hei vang hian ram eng emaw zat chuan Brazil aṭanga sa an lakluh ṭhin hi an lo titawp tawh a ni.

Ram ṭhenkhatten Brazil sa siam lakluh an khap hnuah US hian a khap ve mai lo a, mahse uluk takin Brazil aṭanga an sa lakluh hi a enfiah a ni. Enfiah a nih hnuah Brazil aṭanga sa an lakluh tam zawk chuan test an paltlang zo lo a, thla thum kalta chhung khan Food Safety and Inspection Service (FSIS) chuan Brazil aṭanga bawng sa aṭanga thil siam thawnluh tur zinga 11% zet chu a lo hnawlsak tawh a ni.

Brazil hi khawvela red meat leh arsa aṭanga thil siam thawnchhuak tam ber ram niin, kum khatah dollar tluklehdingawn 12 man vel a thawnchhuak ṭhin. A tam zawk hi China, European Union leh United States ramah te thawn a ni. Sa endiktuten thamna an la ṭhin tih prosecutor-ten an puanchhuah hnu hian an sa thawnchhuah hi a tlahniam chak hle.