US-in monkeypox vangin Public health emergency puang

US public health official-te chuan an rama monkeypox hri darh zel vangin public health emergency an puang.

Public health emergency hian ni 90 chhung a awh dawn a, a ṭul dan azirin pawhsei leh theih a ni.

August 3 thleng khan, US-ah monkeypox hri vei hi mi 6,600 chuang report an dawng tawh tih Centers for Disease Control and Prevention (CDC) chuan a tarlang. "Hri leng hmachhawn tur hian a hma aia nasa zawka hma la turin kan inbuatsaih a, America mipuite chu monkeypox hi ngai thutak turin kan ngen a ni," tiin Secretary of Health and Human Services Xavier Becerra chuan a sawi.

Monkeypox hri hi khawsik, lu na, taksa kham, tlun leh pangti bawl thak leh na tak angin langchhuak mah se, hlauhthawnawm lutuk erawh a ni lo. United States-ah he hri hi thihpui an awm hriat a la ni lo. "Monkeypox hi natna a rawn lanchhuah aṭanga bawl a dam a, pan khir a tlak vek hma leh vun thar a insiam hma zawng chu midang a kaichhawn theih a ni," tiin, "He natna hian kar 2-4 inkar a awh tlangpui a ni," tih CDC website chuan a tarlang.

Hri hi hun rei tak chhung vun leh vun intawk, inkuah, inpawm, infawh bakah mutbu, towel leh thawmhnaw inṭawm tein a kaichhawn theih a ni. Health official-te chuan mi tupawhin hri an kai thei a, mipa-in a mipat pui a pawlin he hri hi an kai awlsam zawk tih an sawi. US-a hri kai zinga 99% te chu mipain a mipatpui a pawlna aṭanga kai an ni tih Health and Human Services department chuan kar hmasa khan an sawi. Thuneitute chuan vaccine pekchhuahnaah pawh mahni mipatpui kawpte chu an ngaih pawimawh hmasak an ni.

US hian monkeypox leh smallpox kaihhnawih natna atana vaccine an siamchhuah JYNNEOS vaccine 6,00,000 chuang an semchhuak tawh a, mahse hri kai hlauhthawnawma ding mek leh vaccine mamawh tak tak mi maktaduai 1.6 chuang pechhuak tur erawh chuan an la nei daih lo hle.