Israel-in Gaza-ah Sipai a dah belh
Israel sipaite chuan tunkar tir lama West Bank-a Palestinian hel hruaitu pakhat an man avanga phuba lak tuma Palestinian lam aṭanga beih letna thleng thei a nih avangin, Ningani khan Gaza bulah sipai tam zawk a dah belh.
Israel Defense Forces (IDF) chuan thuchhuah siamin, boruak awm dan an thlir hnuah, IDF te'n inring renga area an vil theihnan Gaza division-ah sipai tam zawk thawn luh hi rel a ni, a ti.
Sipai thawn luh belhte hi artillery, infantry, armored leh combat engineering bakah special forces unit-te an ni tih IDF chuan a sawi.
Ningani zing khan Israel-a tualchhung thuneitute chuan inkalpawhna kawng an dangchat a, Israel sipaite chuan Israel leh Gaza inkalpawhna kawng ber Erez Crossing chu an khar bawk a ni.
West Bank hmar lam, Jenin khuaah Thawhṭanni leh Thawhlehni khan Israel sipaite chuan beihpui an thlak a, beihpui an thlaknaah hian Palestinian tleirawl, kum 17 mi a thi a, Palestinian Islamic Jihad pawl member ṭhenkhat manin, an zingh hian an pawl hruaitu zinga mi Bassem al-Saadi pawh a tel a ni.