Thailand Nightclub-a kangmei chhuakah mi 13 thi ; Midang 40 in hliam tuar

Thailand-a nimi zinga nightclub pakhata kangmei chhuakah mi 13 an thi a, mi 40-in hliam an tuar tih rescue services official-te chuan an sawi.

Kangmei chhuahna hmun hi Chonburi province, Sattahip district-a Mountain B nightspot-ah niin, Bangkok chhim lam aṭanga km 150 vela hlaa awm a ni.

Club chhung banga acoustic foam an tar aṭanga kangmei hi chhuak a nih thu leh, kangmei ṭhelh tur hian kangṭhelhtuten darkar thum vel zet hun an hman thu official chuan a sawi.

Thailand hian health and safety regulations mumal tak an neih loh avangin sawisel pawh an tawk nasa ṭhin hle a, a bikin bar leh nightclub-te chuan ngaihthah an hlawh hle.

Kum 2009 khan Bangkok-a nuamtawlna hmun pakhat, Santika club-a Kum thar lawmna neihnaa kangmei chhuakah mi 67 an thih bakah mi 200 chuangin hliam an tuar bawk a ni.

Hemi ṭum hian, rock band pakhat Burn te stage-a an zai laia halmawi rawn phuh chhuak chuan club chu tikangin, Santika neitupa chu kum thum chhung lungin tantir zui a ni.

Kum 2012 pawh khan, Phuket-a khualzinte tawllenna hmun, holiday island club pakhata electric kalsual vanga kangmei chhuakah mi pali an lo thi tawh bawk a ni.