Pakistan oil tanker kângah mi 123 kang hlum

Pakistan-a Ahmedpur East khawpuiah oil tanker letin a kang zui a, a bula vela awm mi 123 an kang hlum.

Oil tanker let aṭanga oil buate laa mi tam tak an punkhawm laiin oil hi tanker hi kangin a puak zui ta nia sawi a ni a, hliam tuar tam tak an tawm bawk. Kangmei chhuah chhan tak hi hriatchian la ni lo mah se, oil buakna hmunah hian meizial zu eng emaw zat an awm a, heng an meibung paih aṭanga chhuak nia sawi a ni.

Sipai thupuangtu chuan hliam tuarte hi sipai helicopter hmangin damdawi in hrang hrangah hruai an nih thu a sawi. Hliam zingah dinhmun ṭha lo tak tak an awm avangin thi zat pawh hi an la pun chhoh rin a ni.

Oil tanker kang hian a bula car paruk leh motor cycle 12 awm pawh a kangkai nia sawi a ni bawk.

Tanker kang vanga thi mi ṭhenkhat chu tu tih hriat lohin khawpin an kangchhia a, DNA sample hmangin an nihna hriat­chhuah theih chauh an ni ang.

Police-te chuan tanker kang hian Karachi aṭanga Lahore-a dah tur, oil litre 25,000 a phur niin an sawi. Kachi Pul area-ah kawngah tawlhin a let a ni. A leh hnu hian a oil phurh bua chu lak tumin kawngpui dunga thingtlang khuaa chengte chu bur nen an kalkhawm a, hmun danga mite pawh an inko khawm hnem hman hle niin police-te chuan an sawi. Traffic police-te chuan mipuite hi tanker bul hnai aṭanga hruai sawn tum mah se an kal sawn duh lo a ni.

Prime Minister Nawaz Sharif-a chuan vanduaina thlenga thi chhung­te chu a tawrhpui thu sawiin, hliam tuar leh thi chhungte chhawm­dawlna kawngah sorkar chuan a theih angin a puih tur thu a sawi.