Yemen-ah cholera vangin mi 1,300 chuang thi tawh

Yemen rama tui hri, cholera leng vangin April thla aṭang khan mi 1,300 chuang an thi tawh niin World Health Organization chuan a sawi.

Cholera hri vei hi mi nuai hnih vel an awm rin a ni a, August thla tawp lamah chuan he hri vei hi nuai thum an tlin chhoh rin a nih thu WHO director-general Margaret Chan chuan a sawi. Chan chuan thla hnih chhung lekin cholera hri hi ram chhunga bial tin deuh thawah a darh hman a ni, a ti.

Chan chuan, “Cho­lera vang hian mi 1,300 chuang an thi tawh a, an zinga hmun lia ṭhena hmun khat chu naupang an ni”, a ti. Cholera hri hi awlsam taka enkawl dam theih ni mah se, Yemen ram hi tual­chhung buaina tawk reng a nih vang­in hei hian inenkawlna lamah pawh a nghawng hle. UN chuan Yemen ramin chhiatna a tawh mek chu mihring siam chawp chhiatna a ni tiin, tualchhung indona nei mek pawl hrang hrangte leh heng pawl thlawptu ramdangte chu mawhphurtuah a puh.

Yemen rama kum hnih chuang tualchhung indona thleng vang hian mi 10,000 chuang an thi tawh a, mi 45,000 velin hliam an tuar a ni. Buaina thleng vang hian an ram mipui maktaduai 26 zinga 11% vel chu an tlanchhe tawh bawk.

Cholera hri leng vang hian chhawmdawl hna thawktu Oxfam chuan kar kalta Zirtawpni khan inkahhai a puang a, mahse hei hian zawm a hlawh lo hle.