Israel leh Gaza inbeihnaah Palestinian pawl hotu a thi

Israel chuan thlawhtheihna hmanga Gaza Strip a beihnaah, Palestinian Islamic Jihad pawla an hotu lu ber dawttu a that.

Air strike vanga thi hi mi 32 an tling tawh niin Palestinian lam chuan an sawi, an zingah hian naupang paruk telin, a tam zawk chu PIJ fighter an ni, PIJ hruaitu Khaled Mansour leh Tayseer Jabari pawh thi zingah hian an tel a ni.

Hetih lai hian Israel official-te chuan kar liamta Zirtawpni aṭang khan Gaza aṭang hian Israel lamah rocket leh mortar 600 dawn kah a ni tawh tih an sawi. PIJ aṭanga vauna an dawn avangin beihpui hi an thlak nghal tih an sawi bawk.

Kum 2021 May thlaa ni 11 chhung Israel leh Gaza indona thlen hnuah tun ṭum hi an inbeih lehna lian tham ber a ni. Hemi kuma an inbeinaah hian Palestinian mi 200 chuang leh Israel mi eng emaw zat an thi a ni.

Israel sipai chuan tuna beihpui an thlak lehna, Breaking Dawn tia a vuah chuan kar khat pawh a awh maithei tih an sawi. Nimin khan kum 2021-a an intihbuai hnua a ṭum khatnan Palestinian rocket, Gaza Strip aṭanga kahchhuah chuan Jerusalem a thleng a ni.

Tun ṭuma an inbeihna hi Israel-in Gaza chhim lama Rafah refugee camp-a airstrike a neihnaa PIJ senior leader Khaled Mansour a kahhlum avanga thleng a ni. Gaza aṭanga Israel beihna tura ruahmanna siamtu bera Israel-in a puh, PIJ commander hian Israel sipaiten thah an tumna chu a hmain vawi nga zel a pumpelh tawh.

Gaza-a airstrike an neih bakah, Israel sipaite hian West Bank an dapnaah PIJ member eng emaw zat an man tawh a, PIJ tunnel network pawh an bei tel tih an sawi.

Hetih lai hian Gaza Strip-a roreltu leh Palestinian pawl lian ber, Hamas chu tun ṭuma Gaza aṭanga rocket kahchhuahnaah hian a tel lo nia hriat a ni. Hei vang hian Israel-in airstrike a neihah pawh Hamas ho hmun a bitum tel lo a ni.