Bangladesh-in fuel man 50% chuangin tisang

Bangladesh chuan Inrinni liam ta aṭangin fuel man 51.7% in an tisang, hei hian an ramin leiba a neih chu tihziaawm theih phah deuh dawn mah se, thil man sang zel avanga harsatna erawh a zual phah dawn a ni.

South Asian ram hi khawvela economy ṭhang chak berte zinga mi an ni. Mahse kawlphetha leh eitur man sang chak avangin ramdang bungrua an lakluhna, import bill chu a san phah hle a, sorkar chu loh theih lohin global lending agency, International Monetary Fund leh a dangte hnen aṭanga sum puk ngaiin an awm phah a ni.

Global market dinhmun ngaihtuahin fuel man sang hi chu loh theih loha thleng tur a ni tih ministry thuchhuak chuan sawiin, state thuhnuaia awm Bangladesh Petroleum Corporation (BPC) chuan thla ruk chhungin oil an hralhna aṭangin USD mtd 85 chuang an hloh tawh tih a sawi.

"Fuel man sang hi mi zawng zawng tan tawrh theih a ni dawn lo. Mahse, kawng dang kan nei lo a ni. Mipuite chu zawldawh taka an awm a ngai," tiin state minister for power, energy and mineral resources Nasrul Hamid chuan sawiin, khawvel huapa a man a tlakhniam chuan her danglam ve zel a ni ang, a ti.

Bangladesh-a thil man sanna chu a zawnin thla ruk chhung 6% chunglamah a awm tawh a, July thla khan 7.48% chuang tling lehin, mirethei te leh middle-income chhungkuate tan phurrit lian tak a tling tawh. Sorkar chuan nikum November thla khan diesel leh kerosene man chu 23% in an tisang a, hei vang hian transport fare pawh 30% dawnin a san phah tawh.