IS kut aṭangin Raqqa district la let

US thlawp Kurdish leh Arab pawlte chuan Pathianni khan Islamic State (IS) firfiak pawl kut aṭangin Syria-a Raqqa khuaa al-Qadisia district chu an la let.

Syrian Democratic Forces (SDF) hian tun thla tir lam aṭang khan firfiakte khawpui, Raqqa hi lak let tumin beihpui an thlak ṭan a ni. Qadisia district hi Raqqa khawthlang lam biala awm niin, ni thum chhung nasa taka an inbeih hnuah firfiakte kut aṭang hian an la let thei ta a ni.

US kaihhruai ṭangrual ramte chuan SDF-te’n firfiak pawlte an beihnaah an pui reng bawk a, ṭangrual ramte hian IS hotu leh Turki Binali chu thlawhtheihna hmanga bomb an thlaknaah a thi tawh niin an sawi. Kar hmasa khan IS financier pawimawh tak, Fawaz al-Rawi pawh an lo that tawh niin an sawi bawk. Hetihlai hian Syrian Observatory for Human Rights chuan ṭangrual ramten beihpui an thlaknaah hian civil mi tam takin harsatna an tawrh phah niin a sawi thung.

Iraq sipaite pawhin an ram khawpui lian pahnihna, Mosul chu IS kut aṭanga laklet tumin ngawrh takin an bei mek a, he khawpui hmun thuma ṭhena hmun hnih chu an la let tawh niin an sawi. Federal police commander, Raed Sahker Jawdat chuan Pathianni khan thuchhuah siamin, IS hian an ram lak 80% vel an hloh tawh a, hnehna an chang thuai tawh dawn tih a sawi.

Mosul khawpuia firfiakte la awmna zinga pakhat, al-Sarj Khana district chu Federal Police unit-te chuan an hnaih tawh hle tih an sawi. Jawdat chuan firfiak zinga eng emaw zat chu he khawpuia cheng, civil mite zingah an biru a, heng mite zawnchhuah a, civil mite chunga tawrhna thlentir loh dan an zawng mek tih a sawi.