Hong Kong-ah activist-te’n lungawi lohna lantir
Hong Kong democracy thlawptute chuan Britain-in China kuta Hong Kong a hlan champha vawi 20-na puala China President Xi Jinping-a’n a tlawh tur duh lohna lantirin nimin khan lungawi lohna an lantir.
Kum 1997 khan Britain chuan Hong Kong hi China kutah a hlan a, hemi pual hian ni thum cham turin Ningani hian President Xi chuan Hong Kong hi tlawh a tum a ni. Hemi duh lohna lantir hian activist-te chuan Hong Kong emblem, Bauhinia par lim chu puan dumin an khuh a ni. Puan duma an khuh hi kum sawmhnih chhung China thuneihna hnuaia hrehawm taka an awm lantirna a nih thu an sawi.
Bauhinia lim khuhna puan hi la thla turin police-te koh nghal an ni a, hetihlai hian lungawi lo pungkhawmte chuan Hong Kong-a democracy tundin an duh thu te, ‘one country, two sytem’ chu kum 20 chhung a taka hman a nih loh thute an lo aupui a ni.
Britain-in China kuta Hong Kong a hlan dawn khan ‘one country, two system’ inremna hi an siam a, he inremna hnuaiah hian Hong Kong-a chengte chu zalenna hrang hrang pek an ni a, heng zingah hian freedom of speech pawh a tel. Mahse China chu kawng hrang hrangin Hong Kong inrelbawlnaah a inrawlh chho zel a, politics, zirna leh media lam thlengin a inrawlh tawh a, Hong Kong khawpui hotu tur pawh China thlawptu committee-in a thlang ṭhin.
Student campaigner Joshu Wong leh midangte chuan inremna lo siam tawh te chu a taka kalpui a, democracy kalphung ang taka inrelbawlna pawh kalpui an phut thu an sawi a ni. Wong hian kum 2014 khan khawpui hotu tur thlanna chu zalen taka neih phutin Umbrella Movement rally a lo nei tawh a, mahse an thil nawr hi a hlawhtling lo.