Qatar laka thil phut zawm vek a har ang : United States

Arab ram pali-te’n Qatar nena an inzawmna siamṭha leh tura Qatar laka an thil phut zinga ṭhenkhat chu zawm a harsat tur thu US chuan a sawi.

Saudi Arabia, UEA, Egypt leh Bahrain-te chuan Qatar ram hi firfiaka chetna thlawp leh, firfiakte suma pui ṭhinah puhin an inzawmna an lo chhu chat tawh a, Qatar nena an inkalpawhnate pawh an khar a ni. US leh ramdangten an inkar boruak siamṭhat dan kawng zawnga inbiakna nei tura an ngen hnuah, Qatar hnenah hian an thil phut 13 an hriattir a, a chhanna atan tunkar Zirtawpni thleng hi hun an pe a ni.

Ram pali-te’n Qatar laka an thil phut an tarlan zingah hian Iran nena inzawmna nghet tak a neih titawp tur leh, Qatar-a Turkey military base khar turtein an phut tel a ni. Hei bakah hian Qatar sorkar chu Al Jazeera TV khar turin an phut tel bawk.

US Secretary of State Rex Tillerson chuan Qatar hian an thil phutte hi a enfiah mek thu a sawi a, an thil phut ṭhenkhat chu zawm a harsat tur thu a sawi. Hemi rual hian Gulf ramte chuan an harsatna chu chinfel dan kawng an ngaihtuah a ngaih thu a sawi a, dawhkan khat kil ho a, firfiaka chetna thlengte beih let dan turte an ngaihtuah ho a ngai a ni, a ti.