Israel-in Syrian post bei

Israel sipaite chuan Pathianni khan Israel hnuaia awm, Golan Heights kah a nih avangin Syria sipaite post an bei let ve nghal.

Syria aṭang hian Golan Heights hmar lam kah a ni a, mahse hliam tuar an awm hriat a ni lo. Hemi chhan letna atan hian Israel sipaite chuan Syria sipaite motor leh post chu an kap let ve nghal a ni. Syria sipaite pawhin an post kahfuh a nih thu an sawi a, darkar 24 chhunga vawi hnih beih an tawhna niin an sawi. Hei bakah hian Syria sipaite hian al-Qaida nena inthlunzawm, Nusra front firfiak pawl an beih mek avangin Israel chetdan chu firfiakte nena an thawhdunna lantirna a ni tiin an sawi bawk.

Colombia-a lawng pilah mi paruk thi
Colombia hmar thlang lam tuipuiah khualzin phurtu lawng chu Pathianni khan a pil a, mi paruk an thi a, chin hriat lohin mi 16 an la awm mek.

Lawng chhawng li-a sang, Almirante hi chawlh hahdamna hmun lar tak, Guatape khaw bul hnaiah a pil a, he lawngah hian mi 170 vel an chuang a, mi 133 chu chhanchhuah an ni tawh. Lawng chesual aṭanga chhanchhuahte chuan an chuanna lawng hi a chetsual hnuah life-jacket pawh pek an ni lo tih an sawi. Lawng chetsual chhan hi hriat a la ni lo a, a khawl lam ṭhat loh vang nge, mi a phurh hnem lutuk vang tih hriat a la ni lo.

Mi 50,000 in human chain siam
Belgium rama Tihange leh Doel nuclear power station khar phutin Pathianni khan mi 50,000 chuangin inkaiin, human chain km 90-a thui an siam. Human chain siamnaah hian Germany, Belgium leh Ne­therland mite an tel a ni. Lungawi lohna lantirtute chuan Tihange leh Doel nuclear power station-te chu hun rei tak daih tura siam an ni lo a, hei vang hian mipui­te himna atan a hlauhthawnawm nia sawiin khar an phut a ni.