Israel leh Palestinian-te'n inkahhai an puang

Israel leh Palestinian pawlte chuan ni thum an inbeih hnuah Pathianni zan khan inkahhai an puang.

Ni thum an inbeih chhung hian mi 44 an thi hman a ni. Hemi hnu hian Egypt palaina hnuaiah Pathianni zan tlai tawh takah khan inkahhai puang tura inremna hi an siam thei ta a ni.

US leh United Nations hotute chuan Israel leh Palestian-te chu inkahhai an puan chu zawm ṭha turin an ngen nghal bawk. US president Joe Biden chuan inremna an siam chu lawmawm a tih thu sawiin, an intiamna hlen tur te, fuel leh chhawmdawlna supply-te chu Gaza a thleng em tih ngaihven ṭha turin a ngen bawk a ni.

Gaza Strip-a Palestinian pawl pakhat, Palestinian Islamic Jihad (PIJ)-in rocket hmanga Israel a kah avangin Israel sipaite hian Gaza-ah hian beihpui an thlak zui a, ni thum chhung an indo hman a ni.

Palestinian health ministry chuan Pathianni tlai thleng khan mi 44 thi chhinchhiah ni tawhin, an zingah naupang 15 an tel tih a sawi. Palestinian mite thihnaa mawhphurtu chu Israel tharumthawhna vanga thleng a nih thu leh he inbeihna vang hian mi 300 chuangin hliam an tuar phah tih a sawi bawk.

Hetih lai hian Israel chuan Gaza chhunga mi eng emaw zat thihna thleng chu PJI thiltih niin a puh thung a, PJI rocket kahchhuah peng darh ṭhenkhat chuan Jabalia fuhin, naupang eng emaw zat an thi niin an sawi.

Gaza-a helpawl chak ber zinga mi, PJI hi Iran chuan thlawpin, Syria khawpui Damascus-ah headquarters an nei a ni. Israel rama pawkhawihna tam tak thlengah inhnamhnawiha puh an ni.

Kum 2019 November thla khan Israel sipaite leh PJI hi ni nga chhung an lo inbei tawh bawk. Hemi ṭuma an inbeihnaah hian Palestinian mi 34 an thi a, mi 111 in hliam an tuar. Israel mi 63 pawh damdawia enkawl ngaiin an awm phah bawk.