China-in Taiwan chhehvelah military drill neih chhunzawm zel

China sipaite chuan nimin khan Taiwan chhehvela tuipui leh van lama military drill an neih chhunzawm leh.

People’s Liberation Army (PLA) chuan United States House Speaker Nancy Pelosi-in Taiwan a tlawh tuk, kar liam ta Ningani aṭang khan ni li awh tur live-fire exercise chu Taiwan hualvela region parukah an nei ṭan nghal a ni. He drill hi Pathiannia tawp tur ni mah se, nimin khan an neih chhunzawm leh nghal a ni.

Pelosi-in Taiwan a tlawh hian China a tithinur hle a, a lungawi lohna lantirna atan Taiwan chungah a vawi khatna atan ballistic missile enchhinna an nei a ni. Zirtawpni liam taa Pelosi-in region a chhuahsan hnuah theatre-level command, defence policy coordination leh military maritime consultation chunchanga palaite inbiakna neih tum chu a ṭhulh nghal bawk. Pentagon, State Department leh White House official-te chuan China chetdan chu an dem thu leh, uchuak taka kal leh mawhphurhna hre loah an puh.

Ni li awh exercise an neih chhung hian short-range ballistic missile 11 bakah, Chinese warship, fighter jet leh drone hmangin Taiwan thliarkar chhehvel chu an vil reng a ni.