Fuel man tihsan duh loin Bangladesh mipuiiin lungawi lohna an lantir

Bangladesh sorkarin fuel man 51.7%-a a tihsan avangin mipuiten lungawi lohna an lantir a, fuel man sanna chu sut leh turin an phut.

Mipui hi khawpui hrang hrangah pungkhawmin, sorkar laka lungawi lohna hi an lantir a ni. Hetih lai hian prime minister Sheik Hasina kaihhruai sorkar chuan fuel man san chhan chu Russia leh Ukraine indo vangah a puh thung.

Sorkarin fuel man a tihsan hnuah bus operator-te chuan bus fare an tisang nghal a, Bangladesh Jatri Kalyan Samity (BJKS) leh pawl ṭhenkhatte chuan hei hi duh loin, senso san phah dante uluk taka chhut chian a nih hnuah chauh bus fare thar pawh hi siam a ni tur a ni, an ti.

Eptu pawl lian ber, Bangla­desh Nationalist Party (BNP) secretary general Mirza Fakhrul Islam Alamgir chuan sorkar hmalakdan chu buaina tibelh­chhah­tu tia sawiin, hei hian an economy-ah a chhe zawngin nghawng lian tak a neih tur thu a sawi.