US Supreme Court-in Trump-a travel ban hman remti

US Supreme Court chuan President Donald Trump-a'n Muslim tamna ram paruka chengte laka US luh khapna thupek a siam chu hman a remti a, a hnuah ennawn leh a nih tur thu a sawi.

He thupek hi hman a nih chuan Muslim ram paruk - Iran, Libya, Somali, Sudan, Syria leh Yemen ram mite chu ni 90 chhung atan US-ah an zin khapsak an ni a, US khua leh tui dik tak nena inlaichinna leh inzawmna ṭha an nei tih finfiahna neite chauh luh phalsak an ni dawn a ni.

President thupek hi federal appeal court pahnih chuan an lo dansak tawh a, he thupek hi Muslim-te thliarhranna niin an sawi a ni. Mahse Thawhṭanni khan Supreme Court chuan zin khapna thupek hi hmang phawt turin a ti a, October thlaa court-in hemi chungchang a ngaihtuah ṭhat leh hma chuan hman rih a ni ang.

Trump chuan Supreme Court-in a thupek siam a thlawp chu lawmawm a tih thu sawiin, an ram himna tura hnehna ropui tak a ni, a ti. Kumin January thlaa a ṭum khatna atana thupek a tihchhuah pawh khan an ram himna tur atana tih a nih thu a lo sawi tawh a ni.