Chinese activist medical parole-in chhuah
Khawvel chawimawina sang, Nobel Prize pawh lo dawng tawh, China sorkar policy a sawisel avanga man, Chinese activist Liu Xiaobo chu thin cancer a vei avangin medical parole-a chhuah tir a ni.
Kum 61 mi, Liu hian democracy thlawp a, China rama mipuite zalenna zau pek duhna a aupui avangin kum 2009 khan man a ni. Jail-a a tan hnu, kum 2010 khan Nobel Peace Prize dawng tura thlan a ni a, mahse he chawimawina hlanna hunah pawh hian China sorkar chuan a kal a phalsak lo.
Sorkar chuan Liu chanchin lam hawi reng reng tihchhuah tur a dan avangin social media lamah pawh a chanchin hi hmuh tur a awm ngai lo. A nupui, Liu Xia pawh kum sarih dawn chu pawn chhuak thei loin, house arrest-a hren a ni bawk.
Liu hi thla hmasa khan a thin a cancer tih hmuhchhuah a ni a, Lioning province-a damdawi-inah enkawl mek a ni.
US chuan Liu Xiaobo leh a nupui hi an duh anga an kalkual theihna tura zalenna pe turin China a ngen a, Beijing-a US embassy thupuangtu chuan Liu chanchin kimchang zawk hriat tumin an ngaihven mek tih sawiin, Liu chauh ni loin a nupui pawh hi chhuah zalen turin China thuneitute an ngen tih a sawi.