Brazil President eiruk thubuai siamsak

Brazil prosecutor-te chuan an ram President Michel Temer chu eiruk thubuai an siamsak.

Prosecutor General Rodrigo Janot chuan Supreme Court-ah thubuai hi thehlutin, President Temer hian sa thawn chhuaktu company hnen aṭangin thamna real 500,000 (dollar 150,000) a dawng niin a sawi.

President laka thubuai thehluh hi Congress member hmun thuma ṭhena hmun hnihin an pawmpui chuan Temer-a thubuai hi court-ah ngaihtuah a ni ang a, a thubuai hmachhawn tur hian thla ruk chhung suspend a ni bawk ang. Congress-in a pawmpui a nih chuan Temer hi president ṭanglai zinga thubuai hmachhawn ngai hmasa ber a ni ang. Janot chuan president lakah hian thubuai dang pawh ni reilote hnuah thehluh belh a tum tih a sawi.

Temer chuan tih dik loh engmah a neih loh thu a sawi thung a, president a nihna aṭanga ban a tum lo tih a sawi bawk. Engmahin amah leh a minister-te chu an tihchhiat loh tur thu a sawi a ni.

Michel Temer hi Brazil president ni tawh zinga mipuite lawm hlawh lo ber niin, mipui ngaihdan lak hnuhnung berah amah duhtu hi 7% vel chauh an tling pha a ni. Mahse Congress lower house-ah hian thlawptu a ngah tawk vangin Janot-a'n a laka criminal charge a siam hi hmachhawn ngai loa a pumpelh theih rin a ni.