Vaccine siamna tur information Ruk tumah Russia puh

Britain, United States leh Canada ramte chuan Russia chu Covid-19 vaccine siamna tura an hna thawhnaah information pawimawh ruk tumah an puh.

Information ruk tumtute hi APT29 group, Cozy Bear tia hriat ni bawk an nih thu an tarlang a, he group hi Russian intelligence service niin an tarlang. Britain foreign secretary Dominic Raab chuan an ram leh a thawhpui ramte chuan theihtawp chhuaha khawvel mite damna tur, Covid-19 vaccine hmuhchhuah tuma  an thawh mek laia Russia-in hetiang thil dik lo a ti hi midangte chhiatna a duh zia tilangtu a ni, tiin a sawi. 

Hetih lai hian Russia chuan an puhna hi thu dik lo a nih thu a sawi thung a, Britain rama phar­maceutical company leh research centre-te information hack sak tum an awm thu an dawng lo tih, Russian thupuangtu Dmitry Peskov chuan a sawi a ni. Ninganni khan Britain, US leh Canada ramte chuan thuchhuah inṭawm an siam a, Cozy bear chuan malware, WellMess leh WellMail an siam thu an tarlang a, tun hnaia an beih te hi Covid-19 vaccine siamchhuah tumte an ni tlangpui a, organisation-te IP address hmanga information pawimawhte hi lak ruk an tum niin an tarlang bawk.    

April thla khan US Depart­ment of Homeland Security-a cybersecurity agency chuan cybercriminal leh pawl dangin Covid-19 vaccine siam tumtute hack an tum thu tarlangin, ram dangte fimkhur turin a lo hriattir tawh. A bik takin health care agency-te, pharmaceutical company, academia, medical research organisation-te leh tualchhung sorkarte chu heng cybercriminal leh pawl dangte hian an information-an hack awlsam thei niin US cybersecurity agency chuan a tarlang a, fimkhur turin a chah nghal bawk a ni.

Covid-19 hri kaite tih­damna tur Covid-19 vaccine hmuhchhuah tumin khawvel ram hrang hrangte an intlan­siak mek a, hetih lai hian hmuh­chhuah hmasak ber nih tumin a hmuhchhuah kawnga hnathawkte information lak rukna kawnga intih thiam lohna a awm phah a ni.