South Korea khawpuiah ruahsur nasa vangin mi 8 thi

South Korea khawpui Seoul-ah Thawhṭanni aṭanga ruahsur nasa tak avanga chhiatna thlengah mi pariat an thi tawh. Khawpui chhunga kawngpui leh subway station-te chu tuiin a chim nasa hle a, kawlphetha tihtawp anih bakah mi ṭhahnem takte hmun him lamah an inthiarchhuak bawk.

South Korea Interior and Safety Ministry chuan thi zinga mi pathumte chu semi-base­ment-a tang, tuiin a chim vanga thi an nih thu a sawi. Midang pakuain hliam an tuar a, mi paruk chu chin hriat lohin an awm mek niin a sawi.

Thawhṭanni tlai aṭang khan, Seoul hmun ṭhenkhatah chuan ruahtui hi millimeter 442 (inches 16) a tla a, thuneitute chuan inrinlawkna sang ber, Level 3 emergency alert chu chawpchilh takin an tichhuak nghal. Khawpuiah hian ruahtui hi darkar khatah millimeter 141.5 (inches 5.57) a tla a, thuneituten ruahtui tlak dan an chhinchhiah ṭan aṭanga a tlak tam ber ṭum a ni.

Nimina khawpui chhunga tui tling nasa takte chu ziaawm deuh mah se, kawngpui leh kawngsirah car leh bus tangte an tam avangin traffic a buai phah hle.

Seoul hmun ṭhenkhatah chuan tuiluankawr a inhnawh avangin kawngpui leh subway station-ah a luang nasa hle a, subway station ṭhenkhat chu tui tling a tam avangin Thawhṭanni zan khan khar an ni.

Han lui chhim lam chu ruahsur tuar nasa ber niin, mi hausa awmkhawmna Gangnam district-ah pawh building leh dawr-te chu tuiin a chim nasa hle a, eng nei loin an awm a ni.

Khawchhung mi 800 bawr velte chu school leh gym emaw local community center-ahte an awm mek.

President Yoon Suk-yeol chuan emergency response meeting ko nghalin, thuneitute chu chhiatna nasa zawk a thlen lohna tura chak taka hma la tur leh, tui lian chu thunun tum turin a hrilh. President hian ruahsur vanga chhiatna thlenga thi chhungte a tawrhpui thu sawiin, amah ngeiin tuilenna hmunte tlawhin, chhiatna a thlen belh tawh lohna turin hma a la dawn tih a sawi.

Khawvel sik leh sa din­hmunte thlirin, khuarel chhiatna thleng ṭhin chu nasa zawka a la thlen theih thu a sawi a, hei vang hian an ramin an hman lai disaster management system pawh ennawn a ngaih thu a sawi zui a ni.

Japan hmun ṭhenkhatah pawh Thawhṭanni zan khan ruah a sur nasa hle. Hokkaido-a hmun ṭhenkhatah chuan tui a lian a, mahse thi leh hliam report an awm lo.Thuneitute chuan tuilian leh leimin thleng mai thei dinhmuna ding an nih avangin mipuite chu fimkhur turin an chah.