US-in Ukraine tan ralthuam leh sum lama ṭanpuina pek belh dawn

United States chuan Ukraine sipai tan ralthuam thar ṭhahnem tak bakah sum lama chhawmdawlna pek leh a tum thu a puang thar leh. Hetih lai hian Ukraine leh Russia sipaite chu Ukraine khawchhak leh chhim lamah an inbei mek a ni.

Pentagon chuan Thawhṭanni khan Ukraine sipai ṭanpuina tur, USD tluklehdingawn khat an pek tur thu a puang a, World Bank pawhin US sorkar puihna hmang vekin Ukraine sorkar tan a hranpain USD tld 4.5 an pe dawn tih an puang bawk.

February thlaa Russia-in Ukraine a do ṭan aṭang khan, US hian Ukraine sipai puihna tur, weapon package a siam vawi 18-na a ni tawh. Tuna package thar a siamah hian - high mobility artillery rocket systems (HIMARS), mortar leh artillery ammunition, Javelin anti-tank missile systems, explosives leh demolition equipment-te a tel a ni.

Kumin kumtir lama US Congress-in Ukraine chhawmdawlna tura an lo pawm tawh, USD tld 40 aṭangin he ṭanpui hi pek a ni ang.

Hetih lai hian Russia chuan Ukraine tan ralthuam leh long-range missile an thawn zel avangin US chu buaina tipunlun tuah a puh thung. Russia-Ukraine indonaah hian Russia sipai 70,000-80,000 inkar an thi tawh nia sawi a ni.