Grenade hmangin Venezuela Supreme Court bei

Venezuela Supreme Court chu police helicopter aṭangin grenade hmanga beih a ni.

President Nicolas Maduro chuan Supreme Court beih chungchang hi state TV-ah a sawi a, mahse vanneihthlak takin grenade hi a puak lo niin a sawi. Helicopter hi interior ministry office chung lama a thlawk pawh hmuh a ni bawk. He thila inhnamhnawihte hi zawn mek an nih thu president chuan a sawi.

Sorkar chuan army officer, Oscar Perez tia hriat chuan helicopter hi ru chhuakin, a thlawhkualpui niin a tarlang. Supreme Court beih tuma grenade thlak a nih hnuah sipaite chuan helicopter hi an kap let ve nghal a ni. Helicopter aṭang hian grendate pali thlak a ni a, pahnih chu building vengtu national guard-te bulah a tla a ni.

Venezuela-ah hian hun rei tak chhung President Maduro leh a kaihhruai sorkar duh lohna lantirin nawrh huaihawt a ni tawh a, tharum thawhna pawh a chhuak fo a ni. Maduro-a eptute lamte chuan Supreme Court hian sorkar lam a thlawp avangin an haw hle a ni.

President Maduro chuan July 30 hian special superbody, Constituent Assembly dinna turin vote lak a tum a, he body thar din tur hian thuneihna sang tak neiin, eptu lamin an thunun Congress leh institution dang chungah pawh thu a nei thei dawn a ni.

Maduro chuan a kaihhruai sorkar chu tihhluihna emaw, tharum emaw hmanga paihthlak a nih chuan amah leh a thlawptute chuan ralthuam an chelek a ngai mai dawn niin a sawi. Venezuela-ah hian April thla aṭanga eptu lamten nawrh an huaihawt avanga buaina chhuakah mi 75 vel an thi tawh a ni.