Brazil President-in an puhna a pha

Brazil President Michel Temer chuan an rama top prosecutor, General Rodrogo Janot-a’n thamna laa puha a laka eiruk thubuai a thehluh chu thu dik lo leh phuahchawp mai a nih thu a sawi.

Prosecutor General Rodrogo Janot chuan President Temer hian sa thawn chhuaktu company aṭangin thamna sum a dawng niin a puh a, a lakah hian thubuai a lo thehlut tawh a ni. Mahse President Temer chuan prosecutor puhna hi phuahchawp mai niin a sawi a, tih dik loh engmah a neih loh thu leh a hlauh loh a sawi.

President laka thubuai thehluh hi Congess lower house member hmun thuma ṭhena hmun hnihin an pawmpui chuan a thubuai hi ngaihtuah a ni dawn a, an pawm a nih chuan president hi ni 180 chhung suspend a ni bawk ang. Hemi chhung hian President lailawk atan House Speaker Rodrigo Maia dah a ni ang. Mahse mi tam zawk chuan Congress-ah hian Temer thlawptu an tam avangin President laka thubuai siamsak an lo dan an ring a ni.