Israeli sipaite'n Al-Aqsa Brigade commander an that

Israeli sipaite'n West Bank-a Nablus khua an beihnaah Palestinian mi pathum an thi a, thi zingah hian senior armed resistance commander pawh a tel tih Palestinian health ministry chuan a sawi.

Israeli sipaite chuan an ram huna Thawhlehni zing lam dar 5-ah al-Aqsa Martyrs Brigades commander, Ibrahim al-Nabulsi awmna in chu hualin an kap a, darkar eng emaw zat an inkap zui a ni.

Health Ministry chuan Israel sipaiten an beihnaah kum 19 mi, Al-Nabulsi bakah mi dang pahnih an thi a, mi 60 chuangin hliam an tuar bawk tih a sawi. Hliam tuar zinga pali chu an dinhmun a ṭha lo hle.

'The Lion of Nablus' tia hriat lar, Al-Nabulsi hi thla tam tak chhung a tlanchhe tawh a, Israel-in thah tuma an beihna pawh ṭum eng emaw zat a lo pumpelh tawh a ni. February leh July thlaa a thawhpuite vuina hmuna a inlan hnuah Israel sipaite hian thah ngei tumin an zawng ngawrh hle a ni.

Israel sipai pawhin thuchhuah siamin, 'Firfiak Ibrahim al-Nabulsi chu Nablus khawpuiah thah a ni' a ti, a ina awm firfiak dang pawh thah tel an nih thu a sawi bawk.

Al-Aqsa Martyrs Brigade hi Palestinian Authority thununtu, West Bank-a rorellai Fatah armed wing a ni. Mahse an pawl inenkawlna hi a mumal lo a, tualchhunga group-te chu anmahni duhdan angin an che chhuak mai ṭhin.

Nimin khan West Bank-a khaw hrang hrangah Nablus thah a nih avanga lungawi lohna lantir a ni. Palestinian Authority prime minister, Mohamed Shtayed chuan Israel sipaite chet dan chu a dem thu sawiin, United Nations Security Council hnenah pawh he thil thlenga mawhphurtuah Israel chu puh ngei tur leh, an phu ang hremna pe turin a ngen.

Palestinian political group liante pawhin he inthahna hi an dem thu leh, Israel chetdan chu dawihzepthlak an tih thu an sawi. He thil thleng hian Palestinian mipuiten an ram luahsaktu, Israel dodalna nasa zawk a siamsak tur thu leh, Jerusalem khawpui hmanga Palestinian ram hran din tumna a tuh nghet zawk dawn a ni, a ti.