Ukraine President-in Russian mite zin khap turin ngen ; Russia-in ngawrh zawkin beihpui thlak

Ukraine president Volodymyr Zelenskyy chuan khawthlang ramte chu Russia mite zin khapna siam turin a ngen a, Europe ram ṭhenkhatin he rawtna hi an thlawp rualin Russia erawh a ti thinur hle.

Russia hian a thinrim hrikthlak nan Ukraine khawchhak lamah sipai tam zawk nen ngawrh zawkin beihpui an thlak chhunzawm nghal a ni.

President Zelenskyy rawtna hian European Union-te ngaihdan a tiphir dawn hle niin a lang a, khawchhak leh khawthlang member ram zingah Russia chunga hmalak dan turah ngaih­dan thuhmun an nei thei lo a ni. Zelenskyy hian he rawtna hi Washington Post-in an kawm ṭumin a sawichhuak a ni.

Zelenskyy chuan Russia mi tan kum khat chhung zin veivah khapna dan siam tur hian a ngen a, hei bakah khaw­thlang ram hrang hranga Russia mi awmte chu hnawtchhuak a, an ramah hian thawn kir tir a duh tih a sawi bawk. Russia-in an ram a run avanga hrekna siamte chu a nem lutuk niin a sawi. 'Russia mi tawh phawk chu Russia-ah let tir vek rawh u," tiin, thil thlen dan dik tak chu an hriatthiam phah dawn a ni, a ti. Russia President Vladimir Putin ngaihdan ṭawmpui lo a, indo a thlen tirha Russia chhuahsan tu, Russia mite pawh he hrekna hi huam tel tir vek a duh thu a sawi bawk.

Hetih lai hian Russia chuan Ukraine President thusawi hi an pawm loh thu sawiin, "Russia emaw Russia mite ṭhendarh tuma hmalakna chu hmalakna hlawhchham tur a ni," tiin Kremlin thupuangtu Dmitry Peskov chuan a sawi.