England leh Wales tan 'extreme heat' warning tichhuak

Britain-a weather service chuan Thawhlehni khan England leh Wales hmun ṭhenkhatah khawlum lutuk thleng thei laka inringlawk tura ngenna "Extreme Heat" warning a tichhuak.

Red alert dawta inrinlawkna an puan theih sang ber, amber warning hi vawiin aṭanga Pathianni thleng hman tura tih a ni a, khaw lum avang hian mi tam tak chuan hriselna lamah harsatna an tawk thei tih UK-a Met office chuan a sawi.

Zirtawpni hian khawlum lam chuan 35 Celsius a thlen rin a ni a, Inrinni hian hmun ṭhenkhatah phei chuan 36C a hawlh phak an ring bawk a ni.

July thla kha kum 1935 hnua England-a khua a ro ber ṭum niin, khawlum lam hian a vawi khatna atan 40C a pel fo a ni. Khawlum lutuk avangin power an hmang nasa a, hei hian power pekchhuah pawh a tikhaihlak a, airport runway te chhiain, rel kawng pawh a tibuai a ni. London khawpuiah kangmei chhuak a tam a, Indopui 1-na hnuah kar khat chhunga kangṭhelhtute an buai ber ṭum nia sawi a ni hial.

Ambulance service-te chuan thawk lama harsatna, lu hai leh taksa chauh vangin nitin call 100 chuang an dawng ziah tih an sawi.