Sri Lanka President hluiin Thailand pan tum

Sri Lanka president aṭanga paihthlak tak, Gotabaya Rajapaksa chu vawiin hian Thailand panin hun eng emaw chen khawsak zui a tum nia sawi a ni.

Sri Lanka mipuiten bang tura nawr a, nawrh an huaihawt reng avangin Rajpaksa hian thla hmasa khan an ram hi tlanchhiatsanin Maldives a pan a ni. Maldive a thlen tuk, July 14-ah Singapore a pan leh a, heta ṭang hian President a nihna aṭanga banna hi a thehlut a ni. Sri Lanka President ni tawh zingah term laklawh laia banna thehlut hmasa ber a ni.

Singapore sorkar hian Sri Lanka President hlui hi humhimna hranpa a pe dawn lo niin a lo sawi tawh a, hei vang hian vawiinah Thailand lam hi a pan leh dawn nia sawi ani a, mahse Sri Lanka foreign ministry chuan hemi chungchang hi a sawichiang duh lo.

An ram a chhuahsan hnuah Rajapaksa hi mipui hmuhah a la inlan lo a ni. Amah thlaktu, Sri Lanka President thar, Ranil Wickremesinghe chuan Rajapaksa hi an rama kir chu a tan a la him lo niin a sawi. President a nih tawh loh avangin hum theih a ni tawh dawn lo a, an ram a kir rual hian thubuai hrang hrang siamsak a ni thei dawn a ni.